Мемлекеттік туды қорлаған фотосессия немен аяқталды

2025 жылдың 31 наурызында Атырау әкімшілік құқық бұзушылық жөніндегі соты Қазақстан туымен жанжалды фотосурет түсірген үш қызға қатысты шешім шығарды. Келесі күні, 1 сәуірде сот “фотосессияның“ төртінші қатысушысын жазалады.

Атырау әкімшілік құқық бұзушылықтар жөніндегі мамандандырылған соты ӘҚБтК-нің 434-бабының 1-бөлігі бойынша (ұсақ бұзақылық) құқық бұзушыға қатысты әкімшілік құқық бұзушылық туралы істі қарады.

Сот 2025 жылдың 23 наурызында кәмелетке толмаған А есімді азаматшаның  үш құрбысымен қаладағы Мұз сарайының ғимаратында араб жазуы бейнеленген Қазақстан туы аясында суретке түсіп, фотосуретті әлеуметтік желілер арқылы таратып, ұсақ бұзақылық жасағанын анықтады.

“Құқық бұзушының әкімшілік құқық бұзушылық жасаудағы кінәсі әкімшілік құқық бұзушылық туралы хаттамамен, фотосуретпен, баянатпен және істің басқа материалдарымен толық расталады“, — деп нақтылады сотта.

ӘҚБтК-нің 434-бабының 1-бөлігінің санкциясында 20 АЕК мөлшерінде айыппұл түріндегі әкімшілік жауапкершілік не 5–тен 15 тәулікке дейінгі мерзімге әкімшілік қамаққа алу көзделген.

“Сот қаулысымен кәмелетке толмаған А. – ның заңды өкіліне 39 320 теңге көлемінде әкімшілік айыппұл салынды“,-деп хабарлады Атырау әкімшілік құқық бұзушылық жөніндегі мамандандырылған сотының баспасөз қызметі.

Сот шешімі заңды күшіне енген жоқ.