Семей: Суға батқан көліктің екі жолаушысын іздеу жалғасуда

5 қаңтардан бері Семейде өзенге құлаған көлікте болған екі адамды іздеу жалғасуда. Операцияға Абай облысынан, Шығыс Қазақстан және Павлодар облыстарынан құтқарушылар, сондай-ақ Алматыдан жедел–құтқару жасағының мамандары қосылды.

ҚР ТЖМ мәліметі бойынша, іздестіру үшін эхолоттармен жабдықталған 12 жүзу құралы, 3 суасты дроны және 2 пилотсыз ұшу аппараты жұмылдырылды.

Жоғалған қыздардың бірінің туыстары іздеу жұмыстарына қажетті қайықты сатып алу үшін қаражат жинауды жариялапты-мыс. Қажет  сомма 1 200 000 теңгені құрайды. Алайда, Абай облыстық ТЖД-да қазіргі уақытта қосымша жүзу құралдарының қажеті жоқ екенін хабарлады.

“Біз қала тұрғындары мен қонақтарынан ауа-райының қолайсыздығына байланысты  су қоймаларына жақындамауды сұраймыз“, деп хабарлады ведомстводағылар.

Іздестіру операциясы жалғасуда, жоғалған адамдарды табу үшін барлық қол жетімді ресурстар тартылды.