Қазақстанның екі өңірінде оқушылар қашықтықтан оқымақ

Екінші ауысымның оқушылары Қазақстанның екі өңірінде қашықтықтан оқытуға ауыстырылды.

Павлодар облысы

Екібастұзда ауа–райына байланысты екінші ауысымның 0-4 сынып оқушыларының сабақтары онлайн режиміне ауыстырылды. Павлодар облысында 21 қаңтарда қарлы боран мен желге байланысты секундына 15-20 метрге дейін екпінмен дауылды ескерту қолданылады. 22 қаңтарда өңірде қатты қар, боран, Павлодар облысының оңтүстігінде, шығысында кейде екпіні секундына 23-28 метрге жетуі мүмкін.

Қостанай облысы

Ауа-райына байланысты 21 қаңтарда Қостанай мектептерінде екінші ауысымның сабақтары қашықтықтан оқыту форматына ауыстырылады. Қостанай облысында 21 қаңтарда ауылдық мектептер де боранға байланысты қашықтықтан оқытуға көшуде. Жітіқара ауданында 1-11 сынып оқушылары партаға отырмайды. Облыстың осы ауданында жел, боран күшейе түсті. Меңдіқара ауданында және облыстың оңтүстік аудандарында екінші ауысым оқушыларына арналған сабақтар да онлайн–форматқа ауыстырылды.