Алматы облысында қар көшкіні автожолды басып қалды

Қар көшкіні бүгін таңертең Еңбекшіқазақ ауданында тіркелді.

23 наурызда сағат 08:28 — де “Түрген ауылы–Батан шатқалы“ облыстық маңызы бар автожолының 23-24 км-де қар көшкіні орын алды. Түсудің себебі қар жамылғысының тұрақсыз күйі және таулардың баурайында қардың едәуір қорының болуы, деп хабарлады Алматы облысы ТЖД баспасөз қызметі.

Қазіргі уақытта қар көшкінінің параметрлері нақтылануда. Салдарды жою және қауіпсіздікті қамтамасыз ету үшін “Қазселденқорғау“ ММ және Алматы облысы ТЖД қызметкерлері мен техниктері жұмылдырылды.

Естеріңізге сала кетейік, ТЖД Алматы облысының жолаушылар көлігі және автомобиль жолдары басқармасының шешімімен 2024 жылдың 15 қарашасынан 2025 жылдың 31 наурызына дейін “Түрген — Батан — Аса обсерваториясы“ автожолының (15-41 км) учаскесінде көлік қозғалысы қауіпсіздік мақсатында жабылған болатын.

Төтеншеліктер азаматтарды сақтық шараларын сақтауға және маршруттарды жоспарлау кезінде осы ақпаратты ескеруге шақырады.

Естеріңізге сала кетейік, бұған дейін Алматы тауларында көшкін қаупін азайту үшін бақыланатын жарылыстар жүргізіліп жатқаны хабарланған болатын.

Бұған дейін “Шымбұлақ“ тау шаңғысы курортында трассадан тыс шаңғы тебу кезінде үш шаңғышы 95 текше метр көлемінде қар көшкінінің түсуіне себеп болған. Нәтижесінде үшеуі де үйінді астында қалды, олардың біреуі қар астында қаза тапты.