Шымкенттіктерді тұрғын үймен қамту шаралары жоғары қарқынмен жүргізілуде

Шымкент қаласында тұрғын үй құрылысы 2025 жылы да жоғары қарқынмен жүргізілуде. Қала билігі мен құрылыс басқармасы бірлесіп, халықтың тұрғын үй мәселесін шешуге және әлеуметтік-экономикалық дамуды ілгерілетуге бағытталған ауқымды жобаларды жүзеге асыруда.

Биылғы жылы атқарылған жұмыстар тұрғындардың өмір сапасын арттыруға және қала инфрақұрылымын нығайтуға елеулі үлес қосуда.
2025 жылға арналған жоспарға сәйкес, құрылыс басқармасы 104,9 млрд теңгеге 69 жобаның құрылысын жүргізіп, 98 нысанды пайдалануға беру міндетін қойды. Оның ішінде жыл соңына дейін 62 нысан тапсырылмақ, ал 35 нысан 2026 жылға өтпелі.
Тұрғын үй құрылысы бойынша 57 көпқабатты үй салынып, оның жалпы ауданы 283,5 мың шаршы метрді құрайды. Биыл 31 үй пайдалануға беріліп, 2 412 пәтер жаңа тұрғындарға үлестіріледі. Бұдан бөлек, әлеуметтік осал топтарға 379 пәтер сатып алу жұмыстары да жалғасуда. Өткен жылы да жастар мен әлеуметтік әлсіз топтарға 1 514 пәтер бөлініп, халықтың тұрмыс жағдайын жақсартуға айрықша көңіл бөлінгені байқалды.
Инженерлік инфрақұрылым саласында да маңызды жетістіктер бар: 8 нысанның құрылысын жүргізу жоспарланған, оның 7-сі биыл аяқталады. Бұл қаладағы коммуналдық қызмет сапасын арттыруға бағытталған маңызды қадам.
Қаладағы апатты және сейсмикалық қауіпті үйлердің жағдайы мұқият бақылауда. 233 көпқабатты үйге техникалық зерттеу жүргізіліп, оның 68-і сейсмалық күшейтуді қажет етеді деген қорытынды шықты. Бұл үйлерді жаңарту, қауіпсіздігін қамтамасыз ету бойынша жұмыстар жалғасады.
Сондай-ақ, реновация бағдарламасы аясында 66 апатты үй сүріліп, тұрғындар жаңа үйлерге көшірілуде. Қазіргі кезде 10 үйдегі 113 пәтер иелері қауіпсіз әрі жайлы жаңа тұрғын үйге орналасқан.
Шымкент қаласындағы тұрғын үй құрылысындағы бұл қарқынды даму – әлеуметтік-экономикалық өсудің айқын көрінісі. Қала экономикасы нығая түсіп, халықтың тұрмыс сапасы жақсарып келеді. Құрылыс саласында қатаң бақылау жүргізіліп, мердігерлердің жұмыс сапасына баса назар аударылуда. 2025 жылы келісім шарт талаптарын орындамаған мердігерлерге 5,6 млн теңге айыппұл салынды, бұл құрылыс сапасын арттыруға бағытталған маңызды шаралардың бірі.
Жалпы алғанда, Шымкент қаласындағы тұрғын үй құрылысының қарқынды дамуы мен әлеуметтік бағыттағы жобалардың жүзеге асуы – қаланың тұрақты және әрі қарай өркендеудің айқын белгісі. Тұрғындардың қажеттіліктерін қанағаттандыруға бағытталған бұл шаралар әлеуметтік тұрақтылықты арттырып, экономикалық өсуді жеделдетуде. Алдағы жылдарда да құрылыс саласындағы осы белсенділік қала дамуының жаңа белестеріне жетуге мүмкіндік береді.