Шымкент әкімі «Kiral Dostyk» аяқ киім фабрикасының жұмысымен танысты

Бүгін Шымкент қаласының әкімі Ғабит Сыздықбеков «Оңтүстік» индустриялық аймағында орналасқан «Kiral Dostyk» аяқ киім фабрикасының жұмысымен танысты. Бұл кәсіпорын – мегаполистің жеңіл өнеркәсіп саласына жаңа серпін беріп отырған маңызды өндіріс орындарының бірі.

Фабрика жылына шамамен 1 миллион жұп аяқ киім өндіреді. Қазіргі таңда мұнда 10 адам еңбек етуде, ал өнімдері Ресей мен Қырғызстанға экспортталып жатыр. Өндіріс орнын аралаған қала әкімі кәсіпорынның әлеуетін жоғары бағалап, жауапты мамандарға колледж студенттерін өндірістік тәжірибеден өткізу мүмкіндігін қарастыруды тапсырды. Бұл бастама – жастардың кәсіби шыңдалуына, ал фабриканың білікті кадрлармен толығуына жол ашпақ.

«Kiral Dostyk» өнімдері сапасы мен қолжетімді бағасы арқылы ерекшеленеді. Заманауи технологиялар қолданылып, нарық талабына сай үлгілер шығарылуда. Бұл фабрика бір жағынан импортқа тәуелділікті азайтып, отандық өнімнің бәсекеге қабілеттілігін арттырса, екінші жағынан жаңа жұмыс орындарын құруға мүмкіндік бермек.

Әкімнің айтуынша, мұндай өндіріс орындары қала экономикасының тірегіне айналып қана қоймай, әлеуметтік маңызы зор бастамаларды жүзеге асыруға ықпал етеді. Жұмыс орындары ашылып, жастар тәжірибе жинақтап, халық сапалы әрі қолжетімді тауарға қол жеткізеді.

«Kiral Dostyk» фабрикасы – Шымкенттің индустриялық қуатын айқындап тұрған өндіріс ошағы. Бұл кәсіпорын отандық өнімнің беделін көтеріп, жаңа брендтердің қалыптасуына жол ашып отыр.
Естеріңізге сала кетейік, кәсіпорын Ел Тәуелсiздiгiнiң 25 жылдығы мерекесi қарсаңында 2016 жылы желтоқсан айында салтанатты түрде ашылған болатын. Кәсіпорын оған дейін де 1 жыл бұрын жұмыс істеген еді. Жобаның құны 185 млн. теңге.Индустрияландыру картасы арқылы iске қосылған жаңа кәсiпорында бастапқыда жазғы аяқ киiмдер тiгiлсе, қазiр кебiстер мен әйелдерге арналған сүйретпе аяқ киiмдер шығарылуда.

17news.kz-ақпарат