Шымкенттік дзюдошылар Ақтөбеден 5 медальмен қайтты

15-18 қарашасы аралығында Ақтөбе қаласындағы «Қоныс» спорт кешенінде өткен дзюдодан Қазақстан Республикасы чемпионатында барлық салмақ дәрежелері бойынша жеңімпаздар мен жүлдегерлер анықталды.
Шымкент қаласының спортшылары бұл жарысты 1 алтын, 1 күміс және 3 қола жүлдемен аяқтады. Жарыстың соңғы күнінде 100 келіге дейінгі салмақта өнер көрсеткен Марат Байкамуров алтын жүлдеге ие болса, осы салмақта Ерсұлтан Мұзаппаров қоланы қанағат тұтты. 90 келіге дейінгі салмақта Құдірет Досымов қола жүлде еншілесе, әйелдер арасында 78 келіге дейінгі салмақта өнер көрсеткен аруымыз Зәмзәгүл Файзолланова үздік үштікке ілікті.
Айта кетейік, жарыстың алғашқы күнінде Сабина Юлдашбекова күміс жүлдегер атанған болатын.
Чемпионат командалық сайыстармен қорытындыланады. Бұл жарыс еліміздің үздік дзюдошыларының шеберлігін паш етіп, ұлттық құрамаға іріктеу мен халықаралық жарыстарға қатысуға жол ашты. Чемпионаттың толық кестесі мен қатысушылар тізімі Қазақстан дзюдо федерациясының ресми сайтында @kaz_judoteam қолжетімді.